लक्ष्मीपूजाको साँझ विद्युत् माग १,८१३ मेगावाट पुग्यो, ५८७ मेगावाट विद्युत् भारत र बंगलादेश निर्यात

काठमाडौं  २२ कात्तिक  । 

यस वर्षको लक्ष्मीपूजाका दिन आइतबार साँझ विद्युत्को अधिकतम माग (पिक लोड) १ हजार ८१३ मेगावाट पुगेको छ। नेपाल विद्युत् प्राधिकरणका अनुसार साँझ ६:१५ बजे राष्ट्रिय विद्युत् प्रणालीमा यो उच्च माग दर्ज भएको हो।

उक्त पिक समयमा देशभित्र कुल २ हजार ४००.३० मेगावाट विद्युत् उत्पादन भएको थियो। आन्तरिक माग पूरा गरी फाजिल रहेको ५८७.३० मेगावाट विद्युत् भारत र बंगलादेशतर्फ निर्यात गरिएको प्राधिकरणले जनाएको छ। गत वर्षको लक्ष्मीपूजाको तुलनामा यस वर्ष विद्युत् माग ६८ मेगावाटले बढेको छ। गत वर्ष १ हजार ७४५ मेगावाट खपत भएको थियो।

उत्पादनको संरचना:

• निजी क्षेत्रका आयोजना: १,५३६.५० मेगावाट

  

• प्राधिकरणका सहायक कम्पनी: ४९९.२० मेगावाट

• प्राधिकरणका आरओआर/पीआरओआर आयोजना: ३४२.३० मेगावाट

• प्राधिकरणका जलाशय (स्टोरेज) आयोजना: २२.३० मेगावाट

यस वर्षको लक्ष्मीपूजाको साँझ काठमाडौं उपत्यकाको अधिकतम विद्युत् माग ४८९.५० मेगावाट पुगेको छ। पूजाका समयमा प्रणालीमा कुनै प्राविधिक अवरोध (पावर इन्टरप्सन) नआएको र फ्रिक्वेन्सी ५०.१२० हर्जमा स्थिर रहेको प्राधिकरणले जनाएको छ। आन्तरिक उत्पादन क्षमता वृद्धि भएसँगै चाडपर्वका बेला पनि घरेलु माग धानेर विद्युत् निर्यात गर्ने अवस्था बनेको छ।